;;;;;;;;;;;;;;;;;;;;;;; पाऊस ;;;;;;;;;;;;;;;;;;;;;;;

रिते आभाळ घागर 

करू  पाहतो पाऊस ,

ये ना भीज माझ्यासवे 

नको एकटी जाऊस.

.

............... सांजवेळ तुझी माझी 

............... भिजू देत पावसात  

............... आता तुझे माझे गीत 

............... पोचू देत आभाळात 

.

साऱ्या साऱ्या भिजवावे 

हीच पावसाची रीत 

क्षणभर तो हि थांबे

तुझे ऐकण्यास गीत 

.

............... देहभान विसरून 

............... दे गं पावसाला गाणे 

............... वेडा विसरून आला 

............... त्याचे ढगात रहाणे  

.

का गं बिचाऱ्या छळशी 

त्याला आवरेना रडू 

ओल्या ओल्या पावसाला 

नको सुका सुका धाडू 

.

............... सखे जाऊ नको अशी 

............... बघ आभाळ सुकेल 

............... ' तू ' हि नाही ' तो' हि नाही 

............... कशी कविता सुचेल ?

;;;;;;;;;;;;;;;;;;;;;;;;; अतुल राणे ;;;;;;;;;;;;;;;;;;;;;;;;;;;;